عشان انتا مصري لازم تعاني
وتفقد كرامتك بكل المعاني
وتحرق في دمك سنين مش ثواني
واوعى تصدق كلام الأغاني
بتاع الحضارة وكاني وماني
ده كله هجايص ما يدخل وداني
***************
عشان انتا مصري العذاب بيناديك
بتبدأ في يومك حاجات بترازيك
في نومك في قومك تعكنن عليك
تضايقك ولسه العماص في عينيك
ما فيش مية تشطف صابونة في إيديك
وجسمك ملزق وريحتك عاديك
فتلبس وتنزل وفيك اللي فيك
***************
ورايح لشغلك حتحتاج مواصلة
آدي المترو واقف وكهربته فاصلة
وفي الميكروباص خناقة وحاصلة
أوتوبيس فرامله عايزالها وصلة
وتوك توك ده تايه ومحتاج لبوصلة
***************
بتوصل لشغلك بدم اتحرق
وفي كام مواطن عامللك قلق
بيشكي تقول له روح اندعق
وعركة وهوجة وشاي اندلق
ومخك خلاص من الصداع اتفلق
***************
هترجع لبيتك ده لو كان في بيت
هتوصل هتندم يا ريتك ما جيت
مراتك بتصرخ خلاص استويت
عيالك بتطلب وهات كيت وكيت
تزعق تهاتي يا ناس اتهريت
ولا حد سامعك مهما هاتيت
***************
عشان انتا مصري وده للأسف
فلازم تآسي تعيش تتقرف
وكل الأساسي في حياتك ترف
فتنسى الكرامة وتنسى الشرف
وتسرق وتنصب أو تنحرف
ودمعك بيجري وجرحك نزف
مش انتا اللي مصري جتك...
تعليقات