احترت أشكي لمين من حب عايش فيه
عدت سنين وسنين وانا لسة بحلم بيه
بحلم يكون جنبي واشوف بعيني عينيه
بحلم يكون حبي هوة اللي ساكن فيه
بحلم أكون وياه والمس بإيدي إيديه
وأعيش حياتي معاه وافضل أنا حواليه
***********
احترت أشكي لمين من حب يكويني
بسهر ليالي هواه والنوم جفا عيني
في الليل بقول الآه من شوقي وحنيني
بسأل عليه وبقول: إمتى هنا يجيني؟
إمتى أبص الاقيه جنبي يداويني
محبوبي هوة الدوا.. لو مت يحييني
***************
احترت أشكي لمين من قسوة المحبوب
قلبي.. وعقلي كمان من هجره داوبوا دوب
من قسوة الحرمان تايه أنا ومغلوب
بصرخ من الهجران.. خايف أنا ومرعوب
من لهفتي بناديك: إرجع وداوي قلوب
تعبت من الأوجاع.. ارجعلي يا محبوب
تعليقات