طلعت رصاصة
والرصاصة بتحسم الموقف لصالحك
بتخلي أفكارك تصالحك
بتفكرك بمصالح المقتول وبتنسيك مصالحك
صوت الرصاصة بيسمعه القاتل وبيسمعه المقتول
وبيسمعه الواقف في أول صف بيصرخ يقول
حمرا يا عين الغول
صوت الرصاص بيشجع الأعزل
وتلاقي خصمه اتذلّ
وتلاقي خوفه اتشلّ
صوت الرصاص صوت مزدوج من شطرتين
الأولة صوت الماسورة تطرش المقذوف
والتانية صوت شهقة شهيد يشبه قمر مخطوف
موته يشجع صحبته
تقولش خد في شهقته كل الهلع والخوف
ولا الملايكة واقفة جانبينا صفوف وصفوف
صوت الرصاص بيقول قصاص
وإن قلتلي ديّة قتيل وخلاص تبقى أكيد قناص
قالوا للولد إثبِت
ولما مات قالوا لابوه: "إثبت"
تبقى العصابة اللي ارتوت من دمنا كسبت
يبقى البلد خربت
أثبت؟
أثبت وكل شهيد عليه ألفين شهود
شافوا رحيله زي ما تشوف الغروب في الحزن والرقة
وشافوا تصويب الرصاص في الراس في منتهى الدقة
ولا شافوا صول بيقول لأسياده الكلاب لأه
أثبت.. واللي سفك دمنا قاعد بيترقى
يا ناصر القاتل على المقتول
يا فاصل العلة عن المعلول
بقى ده كلام معقول
يا مدوب السم ف عسل محلول
قاتل وبيطلع لسانه للقتيل ولأهله واللي شيعوه
وللمحامي والشهود والقاضي والمسؤول
قاتل.. نحاول نمسكه نلاقيله مية ديول
قاتل.. نحاول نحبسه يطلعله ألف فلول
يا ناصر القاتل على المقتول
القاتل استمتع بقتله منتهى المتعة
قتل نفر وخد تلاتة جنبه بالشفعة
قاتل وفاكرنا عبيد إحسانه
واللي اتدفن من غير كفن جازز على سنانه
ناقص كمان اللي بيطلب تارُه
ييجوا يقطعوا لسانه
متقولش صفحة جديدة
والصفحة القديمة دمها سايل
واللي كتبها بدمنا
عمال بيتراقص ويتمارض ويتمايل
وإن قلنا خف شوية.. يعندنا ويتثاقل
صفحة جديدة لصالح السافل
ينذل بيها اللي اتقتل ويعز فيها القاتل
مخترتش إني أبقى حي
ولا اللي مات قرر يموت
لكن بإمكاني أعيش شبه الغراب لاخرس إذا اخترت السكوت
اللحظة دي كوبري اتنصب بين لحظتين
والسيد القناص بيسند بوزه عالحافة
والكل عارف هوة مين مهما ورا النضارة يتخفى
جايين نجيب العدل للأيام
محناش دعاة للإنتقام
ولا يوم خطر في بالنا نتشفى
ولا رح نوافق نمشي زي الطرش في الزفة
قصص البراءة الزور بقت مرفوضة
وبنادق القناص في خزنة خصمنا بالواحدة كات معدودة
وإيدينا ماسكة الحلم والدفة
واللي الزمن غره بأعراضنا هنعلمه العفة
قصر الكلام.. اللي قتل يقتل
واللي يقول غير كدة يا إما قاتل
أو يا إما اهبل
اسأل شيوخ الدين أو أي مين يُسأل
اسأل ولي الدم.. غير القصاص يقبل؟
اسأل دموع النيل والورد في المشتل
قصر الكلام.. اللي أذلّ يُذلّ
واللي خذل يُخذل
واللي عزل يُعزل
واللي أكل يؤكل
واللي سأل يُسأل
قصر الكلام
اللي قتل يُقتل
تعليقات