يا مصر رايحة لفين .. محمد عبد القادر



يا مصر رايحة لفين
في العتمة مش شايفة
سايبانا حايرين ليه؟
وقلوبنا ليه خايفة؟
فرسانك الشجعان
انقسموا ميت طايفة
باعوا القضية خلاص
علشان حاجات هايفة
قلعوا القناع وأوام
بانت وشوش زايفة

يا مصر رايحة لفين
ماشية بعكس السير
ابنك صياحه طال
بينادي بالتغيير
دفع الثمن بدماه
في ساحة التحرير
وآخرها شالوا فريق
جابوا مكانه مشير
بقى هوة ده التغيير؟!
حرفين بيتبدلوا
من بعد حرف السين
راح الرئيس حسني
جالنا بداله حسين
واحنا كما المساكين
تايهين ما بين الاتنين
جينا نكحلها
زدنا المبلة طين

يا مصر رايحة لفين
ماشية بعكس السير
عدلك ميزانه اتقلب
والظلم فيكي كتير
 والحق أنّ بألم
م الغش والتزوير
نيلك حرف سكته
وعطّش الجماهير
مش فارقة هوة كمان
مهي ثورة التغيير

يا مصر فوقي قوام
دي السكة مجهولة
خافي على ولادك
لا تاكلهم الغولة
نازلين كلام في كلام
ولا قتة محلولة
كل الكلام اتقال
واهي بانت الفولة
جيشي بيقتلني
بالذمة معقولة
هنا كلاب ضالة
هنا قلة مخبولة
هنا أب مات له شهيد
هنا أم مغلولة
كل الكلام اتقال
واهي بانت الفولة
يا مصر فوقي قوام
لا تموتي معلولة

تعليقات